[ Powšitkowny | Nastawk | Přez internet informować | Sfałdowane łopjena | Plakaty | Wabjenske pasma ]

lernu! 5-lětne

21. decembra 2007 je pjata róčnica starta lernu!, najwjetšeho a najčasćišo wužiwaneho websydła za wuknjenje esperanta. Při tutej składnosći smy tu zajimawe informacije wo projekće, wobrazy, fota a interviewy z wothladowarjemi a wužiwarjemi stronow zběrali. Nadźijamy so, zo so ći spodobaja a snano budźeš je za nastawk w twojej nowinje, wozjewjenku w twojim blogu, w powěsći w někajkim forumje abo w rozesyłanskej lisćinje wužiwać. Jeli maš prašenja wo projekće abo dalše ideje, kak móžemy pjatu róčnicu lernu! woswjećić, skontaktuj nas prošu!

Wo projekće powšitkownje a jeho pozadku

http://www.lernu.net/pri_lernu/index.php

Organizacije, kotrež za lernu! steja

http://www.lernu.net/pri_lernu/subtenantoj/index.php

Ludźo, kotřiž za lernu steja

1. Hłowny team - skupina ludźi, kotřiž so z projektom kóždy dźeń zaběraja, dźěło druhich pomocnikow podpěruja a koordinuja, sami wjele dźěłaja a w zhromadnym dźěle z pomocnikami, wužiwarjemi a ESF wo dołhodobnym wuwiću lernu! rozsudźeja. Team je so w běhu projekta z wjetšeho dźěla změnił a wobsteji tuchwilu z 6 wosobow z 5 krajow a 3 kontinentow. (http://www.lernu.net/pri_lernu/teamo.php)
2. 
   Přełožowarjo - rjekojo, kotřiž, zwjetša cyle dobrowólnje, stajnje rosćacy wobsah lernu! do druhich rěčow přełožuja, k polěpšenju projekta přez komentary a rady přinošuja a komunikaciju z wužiwarjemi, kotřiž esperanto njerěča, posrědkuja. Wosebita podskupina přełožowarjow su słownikarjo, kotřiž so ze słownikami lernu! zaběraja. (http://www.lernu.net/pri_lernu/helpantoj.php)
3. Rěčni pomocnicy - wučerjo lernu!, kotřiž kursowe nadawki pola někotrych kursow koriguja, poradźuja, kak hodźa so kursowe materialije polěpšić, na rěčne prašenja wužiwarjow wotmołwjeja, wirtuelne lekcije nawjeduja, a někotři su w forumach aktiwni. Tuchwilu je to někak třiceći ludźi a nic zrědka su samsne wosoby rěčni pomocnicy kaž tež přełožowarjow za wěstu rěč. (http://www.lernu.net/pri_lernu/lingvohelpantoj.php)
4. Druzy pomocnicy, kotřiž při projektach přez spisowanje wobsaha (na př. za kursy), rysowanki, wobdźěłanje wobrazow, nahrawanje zynkow, programowanje, testowanje, poradźowanje, komentary atd. pomhaja. Su to bjezdwěla wjacore sta ludźi wot spočatka projekta.
5. Wužiwarjo stronow - naposledk, ale zawěsće nic najnjewažniši! Bjez stajneho rosta wužiwarjow, jich podpěry, přećow, idejow a kritikow, strony njebychu so tak wuwiwali, kaž to je so stało a kaž to je so stawa. Wulki dźak! (Tuchwilu lernu! ma 54069 zregistrowanych wužiwarjow.)

Wopisanje stronow

lernu.net je darmotne websydło za wuknjenje esperanta. Njetrjebaš płaćić, zo by so zregistrować abo wobsah wužiwać móhł. Su někotre strony pola lernu!, kotrež wo esperanće samym informawać a wo přičinach, čehodla měł je wuknyć, ale hłowny zaměr lernu! je wučba esperanta. lernu! staja wšě srědki k dispoziciji, kotrež trjebaš, zo by wysoki niwow esperanta - wot nul sem - docpěł. lernu! wobsahuje wuknjenske srědki, pomocne srědki, komunicaciske srědki a čitančka, zo bychu wužiwarjow esperanto nic jenož wuknyli, ale je tež praktikowali. lernu! hodźi so w esperanće a někak 30 narodnych rěčach wuziwać. Přełožki wjele dobrowólnych přełožowarjow čini.

Wuknjenske srědki

Wuknjenske srědki pola lernu! wopřijimaja kursy, zwučowanja, hry a pruwowanja. Je wjele kursow pola lernu!. Najwjetši dźěl kursow tworja zakładne abo kursy za pokročenych, ale su tež někotre kursy, kotrež material za wysoki niwow wobsahuja. Kursy na stronach je z najwjetšeho dźěla lernu! same wutworiło; wobsah su teamowe čłonojo lernu! spisali. lernu! poskića tež wersije někotrych klasiskich kursow, mj. dr. "Gerda malaperis", "La Zagreba Metodo" a kurs, kotryž na zwučowanjach na zakładźe fundamenta bazuje, "Pri la Fundamento".

lernu! wě, zo rozdźělni šulerjo na rozdźělne wašnja wuspěšnje wuknu. Tohodla slěduja kursy lernu! wjacore wučbne metody. W někotrych kursach, na přikład, wuknu słowa a gramatiku a čitaja potom tekst a wotmołwjeja na prašenja (Ana Pana, Ana Renkontas). W druhich kursach čitaja esperantowe sady a přełožki w narodnej rěči, zo bychu gramatiku esperanta z pomocu přikładow město prawidłow wuknyli (Vojaĝu kun Zam). Su tež kursy, kotrež direktnu metodu slěduja; šulerjo wuknu gramatiku z pomocu přikładow a wobrazow, bjez wjele wujasnjenjow (Bildoj kaj Demandoj). lernu! je wosebje horde na "La Puzlo Esperanto", w kotrymž šuler korjenje a afiksy na wobrazowce tam a sem ćaha, zo by z nich esperantowe sady tworił. Tutón kurs pokazuje šulerjam z dorazom, kak słowotwórba w esperanće funguje a kak so esperantowa gramatika wot gramatiki wjele druhich rěčow fundamentalnje rozeznawa.

Wobsah kursow wariěruje po kursu, ale kursy zwjetša čitanja hódny tekst, wuknjenje wokablow, zwučowanje za wupjelnjenje a prašenja wo rozumjenju přečitaneho teksta wobsahuja. Hačrunjež so esperanto z fonetiskim alfabetom pisa, ma wjele kursow lernu! zynkowe dataje, z kotrymiž šulerjo móža prawe wurjekowanje słyšeć a swoju kmanosć rěčany tekst rozumić polěpšić. Někotre kursy maja zwučowanja za posłuchanje, a jedyn kurs, "Mi estas komencanto", hłownje na rěčenju a posłuchanju bazuje.

Zwučowanja w kursach so zwjetša awtomatisce koriguja. Ale zwučowanja třoch kursow "Ana Pana", "Ana Renkontas" a "Kio okazas" rěčny pomocnik koriguje. Šuler móže rěčneho pomocnika wubrać, kiž jeho maćeršćinu rěči (jeli móžno). Šuler móže nic jenož korektury dóstać, ale tež z rěčnym pomocnikom komunikować, zo by so jeho za něčim prašał a přidatne wujasnjenja dóstał. lernu! ma nětko někak 30 rěčnych pomocnikow, kotřiž maja rozdźělnu starobu a su po cyłym swěće žiwi.

Wjele kursow poskića njeformalny test za samopohódnoćenje, tak zo šulerjo móža swoju zrozumjenje kursoweho wobsaha měrić. Přidatnje su někotre chutne pruwowanja, kotrež wužiwarjo móža wužiwać, zo bychu swój postup w rěči posudźowali. Tute pruwowanja su dospołnje esperantorěčne a testuja gramatiku, rozumjace posłuchanje, čitanske rozumjenje a słowoskład. Druhe pruwowanje testuje znajomosće wo esperantowym hibanju. Šulerjo móža po wuspěšnym wobstaću pruwowanje diplom dóstać.

Na lernu! su tež "wirtuelne lekcije". We wirtuelnych lekcijach so šulerjo z rěčnim pomocnikom we wirtualnej rjadowni zeńdu, kotraž kaž chatowy rum wupada, ale z widźomnej webstronje naboku. Rěčny pomocnik nawjeduje lekciju; šulerjo móža z rěčnym pomocnikom a druhimi šulerjemi komunikować, runje tak kaž we woprawdźitej rjadowni. Nawoda móže šulerjam rozdźělne webstrony pokazać, zo by temy ilustrował a přikłady dał. Wirtuelne lekcije su za rozdźělne niwowy a rozdźělne rěče (narodne rěče abo esperanto, po niwowje šulerjow).

Zo bychu swoje wuknjenje podpěrali, móža šulerjo lernu! swoju nowu wědu z pomocu wšelakich zwučowanjow, kotrež su na lernu! w praksy nałožić. Někotre zwučowanja su z kursami zwjazane, ale je wjele kursow, kotrež so na gramatiske zjawy, wuknjenje wokablow a pod. poćahuja. Hodźa so zwučowanja za runje te dźěle rěčow činić, kotrež maja so za najbóle problematiske. Su wjacore rěčne hry na lernu!, kotrež šulerjo móža wužiwać, zo bychu rěč w zabawnišej atmosferje nałožili. Zwučowanja a hry su za rozdźělne niwowy; započatkarjo kaž tež pokročeni rěčnicy móža z nich wužitk ćahnyć.

Pomocne srědki

lernu! poskića nic jenož kursy, ale tež srědki za podpěru wuknjenja. Mjez tutymi srědkami su słowniki, gramatiki a teksty, z pomocu kotrychž hodźi so čitanje zwučować. Strony poskića wjele słownikow (narodna rěč-esperanto a esperanto-narodna rěč). Słowniki so stajnje polěpšuja a powjetšuja, dźak dźěłu dobrowólnych, kotřiž strony přełožuja.

Słownik na lernu! je jónkróćny mjez esperantowymi internetnymi słownikami. Hdyž słowo pytaš, słownik dźěli słowa, zo by mjez korjenjemi a afiksami rozeznawał a dawa definiciju za kóždy dźěl słowa. Za započatkarjow njeje přeco jasnje, kotry dźěl słowa je korjeń, a kotry dźěl je afiks. Na přikład by mało słownikow słowo kaž "birdeto" wobsahowało, dokelž je jasnje, zo dźe wo małeho ptačka. Započatkar wšak snano to hnydom njewidźi. Z pomocu słownika lernu! móže započatkar słowo "birdeto" pytać, formu "bird/et/o" widźeć a definicije za "birdo" a "-et-".

Na nimale wšě esperantowe teksty n lernu! hodźi so "kliknyć". To woznamjenja, zo hodźi so na słowow kliknyć a narodnorěčny přełožk jewi so w znošowacym woknješku (w rěči, kotraž so w słowniku wuběra). Z tutym nastrojom je lochko woznam słowa kontrolować, bjeztoho zo by trjeba było, je do słwonika zapodać abo w knižnym słowniku pytać. Klikń prosće a hnydom widźiš přełožk.

lernu! poskića tež wjacore wopisanja esperantoweje gramatiki. Stej dwě gramatice, kotrejž stej na stronach. Prěnja je krótka gramatika, kotraž w narodnej rěči zakładne temy esperantoweje gramatiki wopisuje. Druha je za pokročenych šulerjow, kotřiž su zwólniwi so nadrobnišo z gramatiku zaběrać. Podrobna gramatika je jenož w esperanće a je skŕotšena wersija PMEG (Plena Manlibro de Esperanta Gramatiko). Nimo toho je strona, kotraž jara podrobne wopisanja wo husto diskutowanych ćežach esperanta wobsahuje.

W knihowni lernu! je wjele tekstow, z kotrymiž šulerjo móža čitanje zwučować. Je wjele powědančkow z knihi "Vere aŭ Fantazie" wot Claude Pirona. Za někotre z tutych tekstow je zynkowa dataja, šuler móže tuž nic jenož powědančko čitać, ale tež na nje posłuchać a swoju kmanosć polěpšić, rěčany tekst rozumić. Za započatkarjow su někotre teksty, kotrež maja přełožk sada po sadźe, zo by šulerjej pomhał, jasnišo widźeć, kak so narodnorěčny woznam do esperanta přełožuje. Su tež teksty (w narodnej rěči kaž tež w esperanće) wo stawiznach a kulturje esperanta, informacije wo esperantowych nowinach a zjeća wo esperantowych knihach, zo by so wužiwarjam zaćišć wo wobšěrnej esperantowej literaturje dał, kotraž je dóstać. Knihownja wobsahuje nic jenož teksty, w njej su tež filmy a hudźba.

Komunikaciske srědki

lernu.net je nic jenož wuknjenski srědk, ale tež komunikaciski srědk. Je ćežko rěč wuknyć, bjeztoho zo by móžnosć była, ju nałožić, potajkim móza wužiwarjo na lernu! jedyn z druhim přez wjele rozdźělnych srědkow komunikować. Wužiwarjo móža so z pomocu priwatnych powěsćow kontaktować, zo bychu w měrnej atmosferje pisanje zwučowali. Móža pohladnicy pósłać, druhim wužiwarjam składnostnje narodnin abo swjedźenjow gratulować abo prośce witać. Je tež powěstnik, z kotrehož pomocu wužiwarjo móža z druhimi wužiwarjemi bjesadować, kotřiž su w samsnym času na stronach.

Wjele wužiwarjow wužiwa forumy lernu!, zo by wšelake temy diskutowało. Su narodnorěčne forumy, přez kotrež započatkarjo móža prašenja wo rěči stajić, wo ćežach rěčeć a rady wot nazhonjenych rěčnikow swojeje maćeršćiny dóstać. Ale najwjetši dźěl forumow je esperantorěčny a wužiwarjo wužiwaja je, zo bychu rěč na zabawne wašnje nałožili. Druhdy wužiwarjo wužiwaja forumy, zo bychu rěč samu rěčeli, ale hišće časćišo rěča wo najrozdźělnišich temach, inkluziwnje swětowej politice, stawiznach a najbóle woblubowanych telewizijnych serijach. We forumach su tež nazhonjeni rěčnicy a někotři čłonojo teama lernu!, štož zawěsća, zo přeco nazhonjena wosoba diskusiju slěduje a móže na komplikowane abo ćežke prašenja wo rěči samej wotmołwić.

Statistika

Podrobna a aktualna statistika wo wužiwanju stronow hodźi so kóždy čas wobhladać na: http://www.lernu.net/pri_lernu/statistiko/resumo.php.

Wosebje zajimawe ličby a přirunanja z grafikami: http://www.lernu.net/pri_lernu/statistiko/index.php.

Kak projektej pomhać?

Praktisce: http://www.lernu.net/pri_lernu/subteno/praktike.php
Financielnje: http://www.lernu.net/pri_lernu/subteno/finance.php

Dźakprajenja

Najprjedy chcemy załožbje ESF (Esperantic Studies Foundation), kotraž lernu! wuznamnje podpěrowaše. Bjez njeje njebychu strony docyła eksistowali. Tež chcemy so wšěm podźakować, kotrež su k wuspěchej stronow přinošowali:

• (něhdyšim) teamowym čłonam, programowarjam a designeram, kotřiž su strony z ničeho wutworili;
• přełožowarjam, kotřiž za wšě tute lěta stajnje powjetšowacy wobsah přełožowachu;
• rěčnym pomocnikam, kotřiž tysacy nadawkow skorigowachu, kotrež buchu wot wužiwarjow zapósłane;
• słownikarjam, kotřiž słowniki zestajachu a redigowachu - jara trěbny dźěl lernu!;
• pomocnikam, kotřiž na wšelake wašnje pomhachu, lernu! přez swoje připomnjenki, rysowanki, nastawki abo druhe přinoški polěpšić;
• časopisam a stronam, kotrež za lernu wabjachu a/abo rjane nastawki wozjewjachu;
• a wězo wužiwarjam, kotřiž nic jenož k stronam přez swoje komentary přinošowachu, ale tež jara přecélne a pomocliwe zhromadźenstwo wutworjachu.

Bjez nich njeby lernu! było tajke, kajke je nětko. Wulki dźak!!!

Interview z projektowym koordinatorom

Interview ze Sonja Petrović Lundberg, nawjedowarka teama lernu! za italski esperantowy časopis:

Daniele Binaghi: Sonja, koordinuješ team lernu!, něwěrno? Kak je mjezynarodne zhromadne dźěło přez internet? Móžeš přikłady za problemy a rozrisanja dać?
Sonja Petrović Lundberg: Haj, sym jedyn z teamowych čłonow lernu! wot jeho projektoweho starta. Druzy čłonojo teama (tuchwilu 5) a sobudźěłaćerjo (něšto dźěsatkow) přińdu z rozdźělnych krajow a kontinentow swěta, tajke mjezynarodne zhromadne dźěło je jara inspirowace a zahorjace, ale druhdy tež komplikowane. Mamy na přikład kóždy tydźeń internetne konferency a je jara ćežko čas namakać, kotryž hodźi so wšěm. Team w USA dyrbi w pjećich abo šesćich rano stanyć a teamowy čłon, kotryž w Koreji bydli, dyrbi dosć pózdźe wječor wotućeny wostać, zo by so na konferencach wobdźělić móhł. Korejski a kanadiski programowar nimale ženje w samsnym času w syći njejstej, štož druhdy zwoprawdźenje wažnych změnow programow poćežuje. Druha ćeža za zhromadne dźěło wuchadźa z rozdźělnych kulturow a towaršnostnych prawidłow: brazilski sobudźěłaćer rozsudźi projekt dla róle homoseksuelnych w jednym z kursow wopušćić, někotři Chinjenjo sabotowachu strony dla małeje lekcije wo Tibeće w druhim kursu a wjacori Američenjo skoržachu wo eksistency lisćiny ze sakrami a z wudmami... Ale na zbožo su tajke přikłady relatiwnje zrědka. Hačrunjež strony su w přez 20 rěčach a tuta ličba rosće, dožiwjemy přeco mjenje problemow w rěčnej komunikaciji, dźak starosćiwje wuwitym přełožowanskim komunikaciskim systemam na jednej stronje, a, samo wo wjele wažnišo, dźak přewysoko njenadhódnoćujomnemu dźěłu mnoholičbnych dobrowólnych přełožowarjow a rěčnych pomocnikow na druhej stronje. Zo by jich dźěło přijomniše a lóše było, dyrbimy, nimo polěpšenja systema přełožowanja a rěčneje pomocy, přeco wobkedźbować, zo wužiwamy rěčnoneutralne formulacije (na přikład njeje móžno prajić, zo so něšto "w lěće 2008" wotměwa, dokelž na sewjernej a južnej zemskej połkuli lěćo je w rozdźělnymaj dźělomaj lěta), zo menijowe zapiski dyrbja lochko do druhich rěčow přełožujomne być, z nic předołhimi wurazami (wobmjezowaneho ruma dla), atd.
DB: Na 100000 wopytowarjow wob měsac, po statistikach lernu!; kak tutón fakt waš nadawk poćežuje abo wosnadnjuje?
SPL: Wysoka ličba stronow sej spěšne, efektiwne techniske rozrisanja wužaduje, kotrež syćowy wobchad zalutować, z tak mało kaž móžno naprašowanjem na serwer a pod. Dyrbjachmy hižo wjacekróć system w pozadku stronow modernizować, zo by z přeco wjace runočasnymi wužiwarjemi na spokojace wašnje fungował a bě tež trjeba wutworjenje wjele stronow a zwoprawdźenje wjacorych wěcow po móžnosći awtomatizować, štož smy na spočatku "z ruku" činili. To wězo naš nadawk poćežuje, ale motiwuje nas tež strony přeco polěpšić a wěda, zo so strony tak jara wužiwaja, dawa wjeselo a inspiraciju.
DB: lernu! je so za swoje "krótke" žiwjenje jara změniło; su nowe wulke změny za bliski přichod wotmylene abo je dźěło na polěpšenje toho wusměrjene, štož hižo eksistuje?
SPL: Njeplanujemy nowe wulke změny w bliskim přichodźe, ale wjacore wulke dodatki. Runje dźěłamy na wukonliwym analyzowym systemje, kotryž slědźi zadźerženje našich wužiwarjow (wězo dodźeržujo jich anonymitu), zo by: 1) nam nadrobniše informacije wo tym dał, kak strony woprawdźe wužiwaja, kotre dźěle su najpopularniše, kotre snano njepytnu (lernu! dźě wobsahuje něšto tysacow stronow) a kotre su "kritiki hódne" abo dyrbja so polěpšić atd; 2) lěpše přiměrjenje stronow a kóždeho wužiwarja zmóžnił, z wosobinskim studijnym planom, wosobinskimi studijnymi pokiwami wutworjenymi po wužiwanju sydła wot wužiwarja, wuspěch w pruwowanjach a pod. Dalše přeće, kotrež mamy hižo dołho, dodatk, abo, poporawom přitwar, je zwužiće nastrojow lernu! za wučbu druhich rěčow, na přikład małych/mjeńšinowych rěčow, za kotrež dotal dobre kursy w interneće njejsu. Pytamy nětko partnerow a móžne subwenciske žórła za tajki projekt. Střeća, chcemy lernu! hišće bliže z esperantowym hibanjom zwjazać, we wobłuku noweho projekta - aktuale.info.
DB: W poslednim času je wjele websydłow za esperantistow zjewiło (myslu, na přikład, na Klaku.net abo Amikumu.com; samo Ipernity.com je nětko w esperanće. Kak widźiš přichod esperanta w interneće (započinaja esperantisća rozumić, na př. kak móža syć derja wužiwać?) A su wuše zwiski mjez lernu! a tymi websydłami wotmyslene?

SPL: Měnju, zo je wjele esperantistow hižo wot jewjenja interneta jeho wuznam za rozšěrjenje esperanta zrozumiło a jara dobre dźěło činiło, po swojich kmanosćach, zo by jón zwužiwało. Ja sama tehdy hišće esperantistka njeběch, ale słyšach wo zažnych wersijach Esperanto.net, wo Kiosko, kotrež běše tež zwonka Esperantskeje popularne a druhe sydła Franka Luina, PMEG, kotraž so w syći a ze syću wuwiwaše, słowniki, kursy a literarne twórby, kotrež buchu jara zahe do syće a tak darmo zjawnosći k dispoziciji stajene. Po mojim zdaću njehodźi so wjele wjace wot pioněrow na tutym polu požadać, kotřiž su tute dźěło dospołnje darmo a jenož w swojim swobodnym času činili. Ale maće prawje, zo so w poslednim času (prajmy wot spočatka tutoho lěttysaca) přeco wjace zorganizowanych a serioznych pospytow jewi, hłuboko sahace potrěbnosće internetneje Esperantskeje identifikować a jim wotpowědować. To zda so mi prawy puć być, a prócowanje wo profesionelnosć a pytanje za móžnosću jónu tež za tute dźěło płaćić (zo bychmy wysoki niwow a kontinuitu zawěsćili) stej dosć nuznej wuměnjeni. Druhi wažny dypk po mojim zdaću je wospjetowanje hižo dokonjaneho dźěła miniměrować, přez wužiwanje a polěpšenje toho, štož hižo prjedy eksistowaše. lernu! wotpohladuje kajkižkuli wuknjenski material na jednym městnje zběrać, tak zo: 1) k wuknjenju zwólniwi njetrjebaja mjez rozdźělnymi městnami w syći błudźić, ale mjenje bóle wšě, štož trjebaja, na jednym městnje namakaja; 2) ludźo, kotřiž bychu rady w syći wučili (jednotliwcy, wšelake esperantowe organizacije a. dr.), maja lochko přistupnu pomoc za internetnu wučbu esperanta w swojej rěči - wšako ma zrědka ta sama wosoba pedagogiske znajmosće a wědu wo syćowych technikach, zo by dobry syćowy kurs činiła; na lernu! su ludźo z wulkej skalu znajomosćow a nazhonjenjow, a woni móža dopjelnjacu pomoc poskićić, kotraž so trjeba; 3) nic kóždy, kiž chce syćowy kurs załožić, dyrbi wote wšěho spočatka započeć, ale móže město toho jenož hižo hotowy material přełožować abo dźěle z nich wužiwać (na př.: słowniki, gramatiske wujasnjenja, zwučowanja, žiwe zhromadźenstwo z wšelakimi wužiwajomnymi komunikaciskimi srědkami) a z pomocu programowarjow swój kurs přidać, abo hru, słownik, zwučowanje, gramatiku... Štož nastupa wuše zwjazanje z druhimi internetnymi projektami, nimamy konkretny plany (nimo aktuale.info, wo kotrymž hodźi so wjace we wikiju E@I čitać), ale smy přeco za sobudźěło wotewrjeni. Wuměna wotkazow, ew. grafiske wabjenje a informacije su jenož minimum toho, štož smy hotowy činić.
DB: W decembrje 2007 změje lernu! pjeć lět. Kak chceće tajku wažny podawk swjećić?
SPL: Z nowymi sobudźěłaćerjemi a pomocnikami. Tuž, jeli waši čitarjo bychu rady pomhali, strony přełožować, rěčni pomocnicy byli (kotřiž lekcije kontroluja a na prašenja wuknjacych esperanta wotmołwjeja), material přiňošowali, při informowanju abo snano financielnje pomhali, namakaj podrobne informacije a wujasnjenja wo tym na stronach samych, pod Wo lernu!/Kak pomhać (http://www.lernu.net/pri_lernu/subteno/index.php).

Měnjenja wužiwarjow

José Antonio Vergara (Chile): Je to rjany, směrodajny, jara wužitny, wysokokajkostny projekt w cyłych stawiznach esperanto, na wysokim niwowje, na kotryž hodźi so hordy być, kotryž w nowym času z njewěrjomnej wutrajnosću a horliwosću ludźi direktnje pokročuje, kotřiž w dwacetych a třicetych lětach zańdźeneho lětstotka dźesać tysacow (snano samo sto tysacow) brošurkow we wjele rěčach pod mjenom "Kluč esperanta" wutworichu. Mam jón jara rady a wosebje jeho titul, dokelž našu čłowjesku, njediskriminowacu namołwu, so zdźěłować a kóždehožkuli wosobinski swět rozšěrić, wuběrnje zjima. Přeprošenje faktisce woznamjenja wukń (a wužij)! Witam tuž team: budźće hordźi na so!

Luigia Oberrauch Madella (Italska): Lubi sobudźěłaćerjo lernu.net! Wjeselu so, zo eksistujeće a njezhubjeće lóšt za nas dźěłać. Waše ideje a jich zwoprawdźenje su woprawdźe wažne za nas wučerjow na cyłym swěće. Z wutrobnym dźakom wšěm strowi was Luigia Oberrauch Madella z Parmy, města lětušeje konferency ILEI.

Adonis Saliba (Brazilska): Wobdźiwanja hódny system, zo by esperanto internetych wužiwarjow wučiło! Tuta metoda měła so hnydom přez rozesyłanske lisćiny wozjewić a pohnuć, zo ludźo tutu metodu přez internet zeznawaja. Esperanto je hižo wulki towaršnostny fenomen, nimo rěčneje strony, a esperantisća kaž tež team tutoho projekta su woprawdźići magierojo našeho hibanja. Dźak wam za wašu ekzistencu!

Feliĉ (Esperantska): Sal! Sym sej runje nowe lernu! prěni raz wobhladał a so mi woprawdźe spodoba, wobšěrne kursy wo jara zajimawych temach. Snano budu hišće kurs za žiwjenske prašenja činić :-) Pokročujće z dobrym dźěłom!

James (Awstralska): Lernu.net je moje preferowane esperantowe websydło. Woprawdźe, dźak njemu moje esperanto so kóždy dźeń polěpšuje. Waše kursy su jara zabawne, a so mi spodobaja kompjuterowe słowa - to woznamjenja, zo esperanto je žiwa rěč a nic mortwa, kaž wjele ludźi mi praji. Jenička wěc, kotraž so mi njespodoba, je, zo waše słowniki wjele neologizmow wobsahuja (hati, mava atd.). Neologizmy so mi njespodobaja, po mojim zdaću znječišćuja rěč. Ale, to je moje měnjenje, a hižo njeskoržu. :p Hišće raz wulki dźak.

Dalše měnjenja wužiwarjow namakaš w hóstnej knize: http://www.lernu.net/pri_lernu/gastlibro.php.